मेक इन नेपाल नामक एक अनलाइन अन्तर्रकृया कार्यक्रम सम्पन्न
1गैरआवासीय नेपाली संघले हिजो २० मार्चका दिन राष्ट्रिय आवीष्कार केन्द्रको सहयोगको लागि मेक इन नेपाल नामक एक अनलाइन अन्तर्रकृया कार्यक्रम सम्पन्न गर्यो । राष्ट्रिय आविष्कार केन्द्रले नेपालमा विविध क्षेत्रहरुमा अनुसन्धान गरी आविष्कार गर्न प्रयास गरिरहेको छ । यस संस्थाले कोरोनाकालमा पनि विग्रेको भेन्टीलेटर बनाउनुका साथै गाउन, मास्कका तथा अन्य उपकरणहरु दिएर नेपाल सरकारलाई सहयोग गरेको थियो ।
हिजो भएको कार्यक्रममा संघका अभियन्ताहरुले रु २२ लाख ३६ हजारको सहयोग गर्ने प्रतिबद्धता जनाउनु भएको र थप सहयोगको लागि संघले आफ्नो संजाल भित्र अनुरोध गर्ने संघका उपाध्यक्ष तथा परोपकारी तथा मानवकल्याणकारी हित विभागका सभापति सोनाम लामाले बताउनु भयो । आविष्कार केन्द्रलाई रु १ करोड भन्दा बढीको फलाम काट्ने लेजर मेशीनको अत्यन्तै आवश्यकता रहेको कुरा केन्द्रका अध्यक्ष महाविर पुनज्यूले जानकारी दिनु भएको छ । यो कार्यक्रम आयोजनाका लागि एशिया प्रशान्त क्षेत्रका क्षेत्रीय उपसंयोजक पारसमणीले संयोजन गर्नु भएको थियो ।
यस कार्यक्रममा संघका अध्यक्ष कुमार पन्त, संस्थापक अध्यक्ष डा उपेन्द्र महतो, पूर्व अध्यक्षहरु जीवा लामिछाने र भवन भट्ट, सल्लाहकार कूल आचार्य लगायत विभिन्न मुलुकका आइसिसि तथा एनसिसिका पदाधिकारीहरु, सदस्यहरुका साथै गैरआवासीय नेपालीहरुको सहभागीता रहेको थियो ।